«Қазақстан – Үндістан: өнер ынтымақтастығы» атты көрменің ашылуы

2024 жылдың 6 маусымында сағат 15.00-де Қазақстан Республикасы Президенті Іс басқармасының Президенттік орталығында «Қазақстан – Үндістан: өнер ынтымақтастығы» атты көрменің салтанатты ашылуы өтеді.

Іс-шара Қазақстан Республикасындағы Үндістан Республикасы Елшілігінің Свами Вивекананда атындағы мәдени орталығы мен Павлодар қаласының «Немалевичи» акварельдік шеберханасымен бірлесе ҚР Президенттік орталығының «Мәдениет арқылы үнқатысу» халықаралық жобасы аясында ұйымдастырылған

Көрменің басты мақсаты – бай тарихи және рухани мұрасы бар Қазақстан-Үндістан қатынастарының екіжақты мәдени байланыстарын дамыту.

Көрмеде 25 автордың 90 акварельдік жұмыстары ұсынылады.

Оның ішінде «Немалевичи» акварельдік шеберханасы мүшелерінің 69 туындысы бар. Бұл жұмыстарда үнді елінің мәдениеті, дәстүрлері, табиғи көркемдігі суреттелген.

Сонымен қатар, көрмеде алғаш рет Үндістан суретшісі Рам Виранжанның 21 акварельдік кескіндемесі енгізілген «Қазақстанның қысқы пейзажы» атты сериялық жұмысы ұсынылады. Рам Виранжанның акварельдік туындыларында Қазақстан ауылдық жерлерінің көз тартарлық қысқы көріністері шынайы көрініс тапқан.

Көрменің салтанатты ашылуына Қазақстан Республикасындағы Үндістан Республикасының Төтенше және Өкілетті Елшісі Нагендра Прасад, еліміздегі шетелдік дипломатиялық корпус, елордадағы мәдениет мекемелерінің өкілдері қатысады.