2017 жылы «ЭКСПО» халықаралық көрмесі өткеннен кейін «Энергия Холы» көрме кешенінің бұдан кейінгі пайдалану жоспары таныстырылып, концерт залын ҚР Тұңғыш Президенті Нұрсұлтан Әбішұлы Назарбаевтың «Жастар жылы» бастамасына қарсаныңда жастарды қолдау мақсатында қала басшылығының тапсырмасымен, ғимарат жастарға берілді.
2019 жылдың 2 қыркүйегінде Мемлекет басшысы Қасым-Жомарт Кемелұлы Тоқаев Қазақстан халқына Жолдауында мәдениет қызметкерлеріне мемлекет тарапынан салиқалы қолдау көрсету туралы тасырмасы негізінде, театр көрермен назарына, әр түрлі жанрдағы спектакльдер мен қойылымдарды ұсынып, еліміздің мәдени дамуына үлесін қосуда. 2018 жылдың 1 қарашасында ашылған «Nomad City Hall» МКҚК-ға басшы ретінде көпшілік арасында жастарға арналған жобаларымен танымал, ҚР Еңбек сіңірген қайраткері Т.Қабатовты тағайындады.
Тұрсынбек Аманғалиұлы Қабатов басшылығындағы «Nomad City Hall»-дың құрылғанына аз уақыт болса да елорда жұртшылығына танылған мәдениет орталығында Республикалық және әлемдік деңгейдегі форумдар, әлем және Қазақстан жастарының басын қосқан фестивальдер, Нұр-Сұлтан қ.әкімдігінің қолдауымен мерекелік концерттер, әртүрлі саладағы жиындар өтуде. Сонымен қатар, Елордадағы ең жас театр осы кәсіпорында бой көтерді.
2020 жылы көпшілікке танымал, шығармашылық жастардың басын қосқан кәсіпорын, Нұр-Сұлтан қаласы әкімі А.Кульгиновтің қолдауымен және Т.Қабатов бастамасымен қазақ театр тарихындағы «алтын дәуірді» қалыптастырып, сахна саңлақтарының жұлдызын жаққан режиссер Әзірбайжан Мәдиұлы Мәмбетовтің есімін алды. Халық қаһарманы есімінің театр ұжымына берілуін Қазақстан театр майталмандары, Ә.Мәмбетов шәкірттері ерекше ықыласпен қолдады.
Елорда тұрғындары мен қала қонақтарының сүйіктісіне айналған театрдың репертуарында әр түрлі жанрдағы көрермендердің жүрегіне ізгі жол салатын, адамгершілікке, ынтымаққа баулитын, адам жанын рухани байытатын, қызықты да әсерге толы 15-тен аса қойылымдар бар: М.Әуезовтің «Жас Абай» драмасы, Д.Исабековтің «Тыныштық күзетшісі» драмасы, О.Бөкейдің «Ауыл хикаялары» драмасы, Д.Исабековтің «Әштен» комедиялық қойылымы, М.Мақатаевтың «Қош, махаббат» драмасы, М.Камолеттидің «Мерекелік меню» музыкалық қойылымы, М.Фрейннің «Театр 180°» комедиялық қойылымы, Б.Томастың «Чарлейдің әпкесі» мюзиклі, У.Шекспирдің «Ричард ІІІ» реквиемі, «Ромео-Джульетта» трагедиясы, А.Володиннің «Сағындым сені» драмасы, сондай-ақ балаларға арналған Р.Киплингтің «Маугли» ертегісі, әлемдік классика «Арыстан Патша» спектаклі. Сонымен қатар, аталған спектакльдер «Abai.tv» мәдени-ағарту телеарнасынан көрсетілуде.
Еліміздің комедия жанрындағы ең танымал актері, театр жетекшісі ретінде жас таланттарды белсенді қолдауда. Қазіргі таңда, театрымызда 70% жастар жұмыс жасайды. Сондай-ақ, жастардың шығармашылық дамуына ат салысуының арқасында театр актерлері А.Бидахметов, Н.Муслимов, А.Айымғазы режиссерлығымен «Арыстан Патша» ертегісі, «Әштен» комедиясы, «Маугли» ертегісі, «Ауыл хикаялары» драмасы қойылды. Сонымен қатар, театр директоры әрі көркемдік жетекшісі бастамасымен театр әлемде болып жатқан пандемия кезеңінде көрермендерді өнер арқылы қолдау мақсатында ауқымды түрлі телевизиялық жобалар, онлайн жұмыстар жасады.
Қазіргі уақытта, Нұр-Сұлтан қаласы Мәдениет басқармасы басшысы Н.Әлімжанов пен театр директоры Т.Қабатов бірігіп Әзірбайжан Мәмбетов атындағы мемлекеттік драма және комедия театрының бұдан әрі дамуына үлес қосуда.
Мекенжайы: Қазақстан, Нұр-Сұлтан қ., Есіл ауданы, Мәңгілік ел даңғылы, 55/2 (B2.3)
Телефондары: +7 ( 775) 284 02 96, +7 (7172) 33 65 82
