Балет «Күлбике»

Балет бәрімізге белгілі Күлбике туралы ертегі хикаясын заманауи тұрғыдан ұсынады. Ертегі желісі мен кейіпкерлер сақталады, ал оқиға орны мен уақыты рококо дәуірінен қазіргі уақытқа ауысады әрі сол заманға кері қайтарылады. Күлбике мен Ханзаданың романтикалық қарым-қатынасы олардың шығармашылық ой-мұраттарының аясында ашыла түседі: Күлбике (Элла) кутюрье болуды, ал Ханзада композитор және ди-джей болуды армандайды.
«Астана Опера» симфониялық оркестрінің орындауында Сергей Прокофьевтің музыкасы Джимми Дюрант, Билли Рэй Сайрус, Луи Армстронгтың заманауи танымал композицияларының атмосфералық акустикалық дыбысталуымен толықтырылған.
Балет хореографиясы поп-би мен брейк-данс элементтері орын алатын неоклассикалық стильде жасалған.
«Күлбике» балеті өмірлік мән-жайлар мен әлеуметтік шығу тегіне қарамастан, өз арманын іске асыру мүмкіндігі идеясы көрініс табатын, отбасымен бірге көруге арналған ізгі әрі көркем спектакль.