1998 жылдың көктемінде «Жерұйық» саябағының бірінші кезегі жоспарланып, іргетасы қаланды. Қала тұрғындарының барлығы бұл жерде алғашқы көшеттерді Қазақстан Республикасының Тұңғыш Президенті Нұрсұлтан Әбішұлы Назарбаевтың өз қолымен отырғызғанына куә болды. Жаңа саябақтың негізін қалауға орталық мемлекеттік органдардың қызметкерлері де белсене қатысып, бірнеше рет сенбіліктерге шықты. Кейіннен саябақтың ішкі аумағы абаттандырылып, уақыт өте келе ағаштар жайқалып өсіп, жапырақтары сыбдыр қақты. Бүгінде келушілер олардың саясында демалып, көгалдардың саф ауасынан ләззат алып, көптеген ұрпақтың игілігіне қызмет ететін еңбектің жемісін тамашалай алады.

«Жерұйық» саябағының құрылысы он жылдан астам уақыт бұрын басталғанымен, оның ресми ашылуы 2008 жылы өтті. Дәл сол кезде саябақ алғашқы келушілерін қабылдады. Жас көшеттердің бой көтеріп, тамырын нығайтуына тура он жыл қажет болды. Саябақтың жалпы аумағы 21 гектарды құрайды. Мұнда ағаштар мен бұталардың 11 түрінен тұратын 10 мыңға жуық көшет отырғызылған. Олардың қатарында қарағай, қайың, терек, мойыл және басқа да ағаш түрлері бар. Саябақтағы көгалдардың жалпы ауданы 95 мың шаршы метрді, ал қоршауының ұзындығы 3,5 мың метрді құрайды. Қазіргі таңда мұнда жаяу жүргіншілер және велосипед жолдары төселіп, орындықтар, мүсіндік композициялар мен шағын сәулет нысандары орнатылған.

Ертегідей атауға ие «Жерұйық» саябағы бүгінде Астанадағы ең көрікті демалыс орындарының бірі саналады. Ол Бауыржан Момышұлы даңғылы бойында, Мағжан Жұмабаев даңғылымен қиылысатын жерде орналасқан. Ыңғайлы кіреберіс жолдары мен автотұрақтардың болуы, тұрғын аудандарға жақын орналасуы, әсем табиғаты мен көркем көріністері, сондай-ақ дамыған инфрақұрылымы бұл жерді отбасылық демалыс үшін тартымды орынға айналдырады.

Балалар үшін саябақ аумағында заманауи ойын алаңдары мен түрлі аттракциондар жасалған. Ал велосипед тебуді және жүгіруді ұнататындар арнайы жабдықталған жолақтардың артықшылығын жоғары бағалайды.

«Жерұйық» саябағының басты символдарының бірі – аңызға айналған «Бәйтерек» ағашы бейнесіндегі мүсіндік композиция. Ол саябақтың орталық бөлігінде, кіреберістен алыс емес жерде орналасқан. Мифтік ағаштың айналасында қос мүйізді пегастар қалықтап ұшса, оны жолбарыс-грифон бейнесіндегі төрт қиял-ғажайып мақұлық күзетіп тұр. Ерекше мүсін өткен мен болашақты жалғайтын өмірдің мәңгілік айналымын бейнелейді.

2008 жылы «Жерұйық» саябағына Қазақстан Республикасының Тұңғыш Президенті Нұрсұлтан Назарбаев қайта келіп, атқарылған жұмыстармен және саябақтың екінші кезегін аяқтау мерзімдерімен танысты.