«Бәріне ортақ жауһарлар» концерті

Камералық музыка бұл музыкалық өнердің айрықша жанры, мұнда орындаушылар саны аз және тыңдаушылар тобы шектеулі болғандықтан, залда сенімге толы ерекше атмосфера орнайды. «Астана Опера» театры Камералық залының афишасы музыка сүйер тыңдарманды дарынды орындаушылардың есімдерімен және олардың алуан түрлі репертуарымен қызықтырады.

«Бәріне ортақ жауһарлар» концертінде музыкалық классиканы халықаралық байқаулардың лауреаттары Әсел Жақиянова (скрипка), Данияр Қадыралинов (виолончель), Зәру Жазықбаева (фортепиано), Жанна Ақтасова (саксофон), сондай-ақ саксофоншылар квинтеті ұсынбақ.

Кеш бағдарламасында композиторлардың венгр және чех халық музыкасының әуені ескен танымал камералық шығармалары орындалады. А.Дворжак, Б.Барток, Д.Поппер, П.Итурральденің камералық туындыларының әсерлі ырғақтары классикалық музыка әуесқойларын бейжай қалдырмайды.