Жастар театры – сан қырлылығымен, жаңашылдығымен қазақ театр өнерінде өзіндік орнын айшықты түрде белгілеген, жас та болса, жасампаз өнер ордаларының бірі. Небәрі 14 жылдық тарихында халықаралық, республикалық деңгейдегі байқаулардан 13 бірдей Гран-При жүлдесін қанжығасына байлауы – жас ұжым өнерінің бағытына бағдар, өрісіне өлшем.
Жастар театры елорда әкімдігінің қолдауымен 2007 жылы шілде айының 5-ші жұлдызында құрылды. Өнер ордасы өз шымылдығын Шыңғыс Айтматов пен Әбіш Кекілбаевтың «Шыңғысхан» спектаклімен (инсценировка авторы Жаныш Құлмамбетов, қоюшы режиссері Қазақстанның еңбек сіңірген қайраткері Нұрқанат Жақыпбай) түрді. Театрдың тұңғыш директоры қызметіне Қазақстан Жастар Одағы сыйлығының лауреаты, Қазақстанның еңбек сіңірген қайраткері Ғани Құлжанов тағайындалса, 2013-2015 жылдары театр тізгіні Жаудыр Айболатта, ал 2015-2020 жыл- дар аралығында Ернар Жұматаевта болды.
2020 жылдың қыркүйек айында Жастар театрының негізін қалаушылардың бірі, белгілі театр және кино актері, Мемлекеттік «Дарын» Жастар сыйлығының лауреаты, ҚР Тұңғыш Президенті – Елбасының мемлекеттік стипендиясының иегері, Қазақстанның еңбек сіңірген қайраткері, Қазақстан Республикасының Мемлекеттік сыйлығының иегері Әділ Ера- лыұлы Ахметов Жастар театрының директоры қызметіне тағайындалды.
ҚР Президентінің 2020 жылғы 14 қыркүйектегі Жарлығы бойынша театрымыздың директоры Әділ Ахметов «Халық алғысы» мерекелік медалімен марапатталды.
«DIMF-2020» XIV Халықаралық мюзикл фестивалінің биылғы өту форматы ерекше болды. 2007 жылдан бері қатысқан 61 мемлекеттің ішінен 284 қойылымның арасынан іріктеліп, ең үздік 9 қойылым, /оның ішінде Жастар театры/ әлем назарына ұсынылды. Атап айтар болсақ, Слова- кия, Қытайлық Тайпей, Франция, Қазақстан, Франция, Словакая, Қытай, Испания, Қытай ел- дерінің қойылымдарын көрермендер тамашалай алды.
Фестиваль 23 қазан мен 1 қараша аралығында DIMF-тің /Deagu International Muzical Festival/ YouTube каналынан онлайн түрде әлем назарына ұсынылды. Қазақстан мемлекеті атынан Нұр-Сұлтан қаласы әкімдігі Жастар театрының «Жібек» мюзиклін (авторы – Ғ.Мүсірепов, музы- касын жазған – Е.Брусиловский) 26-27 қазан күндері көрермендер тамашалады. Спектакльдің режиссері - Қазақстанның еңбек сіңірген қайраткері Нұрқанат ЖАҚЫПБАЙ.
Бүгінде театр репертуарында 50-ге тарта спектакль бар. Көпшіліктің қошеметіне ие болған өнер туындыларының әрқайсысы - айрықша атап өтуге лайық.
Мекенжайы: Қазақстан, Нұр-Сұлтан қ., Есенберлин к., 10
Телефондары: +7 (7172) 38 01 08, +7 (7172) 39 26 48
