«Astana musical» театры ағылшын драматургі  Рэй Кунидің «№ 13» комедиясын ұсынады.

«№ 13» пьесасы – соңғы онжылдықтағы ең үздік комедиялардың бірі. Рей Кунидың бұл тырнақалды туындысы 1991 жылы үздік ағылшын комедиясы ретінде Оливье Лоуренс атындағы сыйлықпен марапатталған.

Қойылымның оқиға желісі қонақ үйдегі №13 бөлмеде көрініс табады. Сюжеттің ирониялық сатирасы үш кейіпкердің айналасында өрбиді. Басты екеуі – беделді саясеткер мен оның хатшысы. Үшінші артық адам – екі көңілдестің кездесуін бұзған қарақшының мәйіті. Абыройына нұқсан келтірмеу үшін бас кейіпкер полицияға да хабарласа алмайды. Күтпеген жерден мәйітке тап болған көңілдестер одан құтылудың амалын іздейді.

№13 – бұл жай ғана қонақ үй нөмірі емес. Бұл нағыз қызық оқиғалар өрбитін, көрермендерді күлкіге қарық қылатын орын. Спектакльдегі қайталанбас сюжет, бір мезеттік үрей, мансапқорлықтың кесірінен орын алатын шексіз былық адам болмысының шынайы табиғатын аша түседі.

Комедияның қоюшы режиссері –театрдың көркемдік жетекшісі Есләм Нұртазин.

«Astana Musical» мемлекеттік театры «COVID-19» би перформансының премьерасын ұсынады.

Жаңа спектакльдің атауы өзі айтып тұрғандай, басты назарда – 2020 жылдың ең танымал сөзіне айналған «COVID-19» құбылысы. Қойылымда ойдан шығарылған кейіпкерлер мен үйреншікті сахналық образдар жоқ. Туынды толығымен өміріміздің қазіргі болмысын көрсететін шынайы оқиғаларға негізделген. «COVID-19» хореографиялық спектаклі – бұл мәңгілік құндылықтар туралы пайымдаулар, адамдардың карантин кезіндегі ішкі ой-толғанысы, санамыздағы өзгерістер, көпшіліктің қисынсыз әрекеттері мен ойға қонымсыз түсініктері, соның нәтижесінде жақындарынан айырылған азаматтардың қайғы-қасіреті...  

Әлемді күрт өзгерткен COVID-19» пандемиясы бізді өзгерте алды ма?  Сақтық шаралары мен шектеулерге дейінгі өмір қайта орала ма? Осы және өзге де өзекті сауалдардың жауабын «COVID-19» атты хореографиялық спектакльден таба аласыздар.

Спектакльдің режиссер-хореографы –Анель Мурзагулова, музыкалық туындылардың авторы - Ақжол Өмірзақов